ઝૂકતી

કપાસના ખેતરે

ફાટેલા ચણિયાની બારીએથી 

દેખાતા કાળામેશ ઢીંચણે 

એમની નજરો તાકતી.

સાઇટ પર

માલમાં નખાતી રેતી-કપચી ભરતાં

એ જ્યારે ઝૂકતી

એના બ્લાઉઝની વચ્ચે, તિરાડે

દેખાતાં ઊભરતાં સ્તનોને 

એમની આંખો ઘૂરકતી.

માસ્તરોની ટ્રેનિંગમાં અભિનય કરતી

એની દક્ષિણી સાડીમાં 

બાજુએથી દેખાતાં વક્ષસ્થળોને

એમની નજરો જોવા મથતી.

વોકિંગ, ટોકિંગ, શોપિંગ માટે

જીન્સ, ટી-શર્ટમાં એ નિકળતી,

ટી-શર્ટમાં ઊભરતાં સ્તનોને જોવા

એમની આંખો ઘૂરકતી.

પણ,

ખેતર, સાઇટ, ટ્રેનિંગ, શોપિંગ એકેય સ્થળે

એમના કોઈપણ અંગને અજાણતા દેખાતા

એની આંખો હંમેશા ઝૂકતી.