ચોખલીયા ને અછૂત

મેલું શરીર ચોખ્ખું કરવાને,

સુગંધીદાર મોંઘો સાબુ લીધો,

હુંફાળા પાણીએ સ્નાન કીધું.

સ્વાદિષ્ટ ભોજન આરોગવાને,

મોંઘા પનીર-શાક લીધાં,

ગરમ-ગરમ ભોજન મુખે લીધાં.

પેટ(ચોખ્ખું) ખાલી કરવાને,

વેસ્ટર્ન ટોઇલેટ લીધાં,

ફ્લશથીએ સાફ કીધું.

ચોખ્ખાં થયા પછીનું

ગંદુ પાણી,

સ્વાદિષ્ટ ભોજન પછીનો

એંઠવાડ,

શૌચ ક્રિયા પછીની

ગંદકી,

સંધુય મોટા ભૂંગળામાં

પ્રસરાવી દીધું.

સફાઈકર્મી આવ્યા,

શર્ટ ઉતાર્યા,

ઢાંકણા ખોલ્યા,

એકે બીજાને માહ્યે ઉતાર્યા.

ડોલચે ડોલચે ઉલેચ્યા

ગંદા ગુને મુતર,

નીકળ્યા પછી બહાર,

ધોયા હાથ ને પગ.

ચોખલીયા ગંદકી કરનાર,

અછૂત ગંદકી સાફ કરનાર

કહેવાયા.

ચોખલીયાએ અછૂતને,

ઘર આંગણની બારે બેસાડ્યા,

વધેલું એઠું ખાવાને દીધું,

ન એમને સન્માન દીધું.