આજીવન અનામત

ખળખળ વહેતુ ઝરણું

કોયલનું કૂહુ કૂહુ

મોરલાનો થનગનાટ

વસંતમાં ખીલેલા પુષ્પો,

એ પ્રકૃતિ મને ગમે છે.

નાનું સુંદર ભોળું બાળ,

રૂપાળી કામણગારી નાર,

બત્રીસ લક્ષણો કામણગારો નર,

એ બધુંય મને આકર્ષે છે.

કવિતા મુક્તક દુહા,

છંદ અને અલંકાર,

ગીત ગરબા ને ગઝલ,

એ બધુંય મને આવડે છે.

એ બધાય વિશે અઢળક 

લખી શકું છું..

તમારી જેમ જ લખી શકું છું.

પણ, નથી લખતી

મારે લખવુય નથી,

લખીશ પણ નહીં.

કારણ મારી કલમ 

પીડિત શોષિત સમાજ કાજે

આજીવન અનામત રાખી છે.