આગ લાગી, કેટલાય ફુલડાઓ
ગભરાયા, ગૂંગળાયા,
તપ્યા, સળગ્યા,
કૂદયા, પડ્યા,
ઝીલાયા ન ઝીલાયા એમાંથી થોડા કરમાયા.
રોકકળ, ગુસ્સો, બૂમો,
આક્ષેપ પ્રતિ આક્ષેપ લગાવાયા.
દોષનો ટોપલો એકબીજાને માથે મૂકાયો.
ફાયર બ્રિગેડવાળા મોડા પડ્યા,
લાંબી સીડી કે જાળીય નો'તા લાવ્યા
લ્યો, આ દોષનો ટોપલો તમારા માથે મૂક્યો.
અમારી પાસે સુવિધા નો'તી,
અધિકારીઓ નેતાઓને કહો,
એ જ તો છે જવાબદાર,
લ્યો આ દોષનો ટોપલો તમારા માથે મૂકયો.
ગેરકાયદેસર હતા કલાસીસ,
ફાયર સેફટીની સુવિધા નથી,
કલાસીસ માલિક છે જવાબદાર,
લ્યો આ દોષનો ટોપલો તમારા માથે મૂકયો.
પણ, અમે તો ભાડે રાખેલી હતી છત,
બિલ્ડીંગ ના માલિક ને કહો,
પૂરતું ભાડું ચૂકવતા હતા,
એટલે વાંક તો બિલ્ડીંગ ના માલિક નો જ,
લ્યો આ દોષનો ટોપલો તમારા માથે મૂકયો.
મોં માંગ્યા હપ્તા આપ્યા હતા,
મળ્યું છે સર્ટી મને સબ સલામતનું,
એટલે દોષિત તો મહાનગરપાલિકા જ,
લ્યો આ દોષનો ટોપલો તમારા માથે મૂકયો.
રાજ્ય-કેન્દ્ર સરકાર ગ્રાન્ટ નથી આપતી,
જનતા ટેક્સ નથી ભરતી તો ક્યાંથી
વસાવી સાધનો? જનતા જ છે જવાબદાર,
લ્યો આ દોષનો ટોપલો તમારા માથે મૂકયો
એક એક વસ્તુની ખરીદી એ ટેક્સ કાપે છે,
Gst કપાઈ છે, ઇકમટેક્સ ભરીએ છીએ,
ક્યાં વાપર્યા પૈસા? સરકાર છે દોષિત,
લ્યો આ દોષનો ટોપલો તમારા માથે મૂકયો,
આ વિપક્ષવાળા કામ જ નથી કરવા દેતા,
એ જ છે આ બધા માટે જવાબદાર,
લ્યો આ દોષનો ટોપલો તમારા માથે મૂકયો,
અમે તો વિરોધ કરી કરીને થાકી ગયા,
સત્તાપક્ષ નકામો છે, કામ જ નથી કરતો,
જનતા જ ચૂંટી લાવે છે, ભોગવો હવે,
લ્યો આ દોષનો ટોપલો તમારા માથે મૂકયો.
સરકાર...જુવો.....જનતા....
એક પણ ચમરબંધી ને છોડવામાં નહિ આવે,
Sit ની રચના કરવામાં આવશે,
ન્યાયિક તપાસ કરવામાં આવશે,
મૃતકના પરિવારને ચાર ચાર લાખ
ચુકવવામાં આવશે.
ખાઈ પીને મજા કરો...
દોષ નો ટોપલો માથા બદલતો રહેશે...
26/5/2019
